ماہر (کم نہ زیادہ، پورے سو لفظوں کی کہانی)

ماہر
(کم نہ زیادہ، پورے سو لفظوں کی کہانی)
۔
میں بینک میں بایومیٹرک کروانے گیا تھا۔
وہاں دو ڈاکو گھس آئے۔
ایک دبلا اور لمبا تھا، دوسرا بھاری بھرکم۔
لمبے کے ہاتھ میں بندوق، بھرکم کے ہاتھ میں بوری۔
چند منٹوں میں انھوں نے سارا پیسہ لوٹ لیا۔
وہ رخصت ہونے لگے تو میں نے اپنا تعارف کروایا،
“بھائی صاحب! میں ایک صحافی ہوں۔
آج ڈالر مہنگا ہونے پر اسٹوری کر رہا ہوں۔
آپ اس بارے میں کیا تبصرہ کریں گے۔”
لمبے نے کہا،
“ابے باولے! ہم ڈاکو ہیں۔
ماہر معاشیات تھوڑی ہیں۔”
میں نے کہا،
“معذرت چاہتا ہوں۔
آپ کے ہاتھ میں بندوق دیکھ کر یہی سمجھا تھا۔”

مبشر زیدی